අතිගරු මෝසස් පෙරේරා මාහිමිපාණෝ
හෙළ කිතුනු ගීතිකාවේ මොසැසි පිය ලකුණ කිසි දා නිමා නොවී රැව්පිළි නංවන ගීයක් වැනිය.
විටෙක එතුමා නමින් වැඩි ප්‍රසිද්ධියක් නොදැරුවද, දෙව්මැදුර තුළට වන් එතුමාගේ පෑන් තුඩගින් අකුරු වූ පදමාලා එදා පටන් අද දක්වාම එපමණකුත් නොව මතුවටත් මේ ලක්බිම හෙළ බසින් පූජාව පැවැත්වෙන සැම විටම ගැයෙනවා නොඅනුමානය.
- නම – මහරගේ මෝසස් පෙරේරා
- උපත – 1899 දී ජාඇල දෙහියාගාත ගමේ.
- පූජකවරය – 1927 දී ගාලු රදගුරු පදවිය සදහා
- මීසම් සේවය – දෙණියාය, බලංගොඩ , රක්වාන, කීරපත්දෙණිය වැනි ඈත දුෂ්කර ගම්මාන
- මාහිමි තනතුර – 1968 (Monsignor )
- සගසැපත – 1985 ( දෙහියාගාතේදී මිහිදන් කෙරිණි)
එතුමා ලියූ ගීතිකා
මින් බොහොමයක් ගීතාවලිය ඇසුරින් නිමවූ ඒවාය. ඊට ජුදා බයිබලයේ එන තෙහෙලියුම් යන වදන ගුරුකොට “තෙහෙලි ගී” යන සොඳුරු වදන හදුන්වා දුන් මෙතුමා “ඔබට පසස ගී” නමින් ගීතිකා පොත් පෙළක්ම නිර්මාණය කළේය.
දෙවන වතිකාන කතිකාවත සියබසින් පූජාව තබන්නට අවසර දෙන විට පියතුමා සිංහල ගීතිකා වලින් සූදානම් වී සිටියේ ය.
ඒ 1964 දී එතුමා පළ කළ ගීතිකා සමගිනි. එදා ඒ ඔබට පසස ගී 1 හී සමහර ගීතිකා අදද ඒ අයුරින්ම ජනතාව අතර පවතී. සැබැවින්ම ඒවාට කල් ඉකුත්වීමක් නොමැත. ඉන් කීපයක් නම්.
- සියල් ජනයනේ
- දුවන ලෙසට
- මහිමේ උස් මණ්ඩලේ
- සුද්දවූ මහිමතාවෙ
- දෙවන් පහන් මිණි නගා
- ජේසුනී නිහඬ වී
- සුරිඳු ජේසු මෑණියේ (මංගල්‍ය ආරාධනව)
- ඔබ ළඟ සරණ සොයා (දේවමෑණියන්ට යැදුම)
මෙම මුල්ම ගීතිකා වලින් පසුව බිහිකළ තවත් නිර්මාණ නම්, එව් අප තොස, අහස ඔබේ, ගයව් ගයව්, අදහමි මගෙ සමිදුනේ, ඔබයි අපට දිරියත්, එළිය ඔබ මගේ, සමිදේ ඔබ ඔබේ දෙසට, වෙති වෙති හිමිපාණෝ, මහ කරුණා , දෙසට කදුකරේ, මා සදහා දිවිපිදුවෙ , බාර ගන්න සමිදුනේ, දක්වත ඔබ, අප ගැන මදකුත් , දෙවියො වෙති, සමිදෙ ඔබෙ කූඩාරමේ, සමිදුන් හට තුති ගී, බලව් බලව් කුරුසේ වැනි කිසිදා අගයෙන් හීන නොවන ගීතිකා රැසක් අපට උරුම කර ඇත්තේය.
කුමරතුගුන්ගේ හෙළ හවුලේ සාමාජිකයෙක් වූ නිසා එතුමාගේ ගීතිකා හෙළ බසින් මනාව පොහොණි වූ අරුත්බර නිර්මාණ වූ අතර ” ඇ” කාරයද බොහෝ තැන් වල දැකිය හැක.
එසේම ගීතිකාවල වියරණ මනාව රැකි එතුමා ඔහොයියා, හේළි, අත්බව වැනි නව වදන් කිතුනු ගීතිකා සාහිත්‍යයට එක්කළේය. මේ ගීතිකා කිසිදා අප මුවින් ගිලිහී නොයන බව නොඅනුමානය.
(මාධව ජයකොඩි )
