පුන ගැයුම:
සිහිවෙනවා සිහිවෙනවා නිතොර දෙවේලේ මට සිහිවෙනවා
ඔබ ගැනැ ඔබෙ පුත් ජේසු තුමා කියාපු විසිතුරු විස්ම කතා
සගවැසි පියාණනේ, ඔබ මට සිහිවෙනවා
පියාගෙ වග තුග මට අඳුනා දෙන්න හිතා ඔබ කීව කතා
ජේසුනි කොතෙකුත් සිහිවෙනවා සග වැසි පියාව මට පෙනෙනා
බාල අකීකරු පුතා එදා පියාව අත්හැර දමා ගියා
උපමාවක් ලෙසැ මා සඳහා කීව වගේ ඒ මට හැගෙනා
පියාව අත්හැර දමා ගියේ ඈත්වෙලා දුර රටකට නේ
ඒ මේ සසරේ දුර කතරේ තතු මට හොඳ හැටි වැටහෙන්නේ
පුතාට වුණු දේ මටත් වුණේ මොනව හොයා මා මෙහි ඉන්නේ
ඉසුරු කියා මා මෙතෙක් අනේ සෙව්වේ වසුරුයි මගේ පියේ
පුතා එදා හොඳ සිහිය ලබා පියාද ගෙදර ද සිහිකෙරුවා
ඇයි යන්නේ මා මෙහි මැරිලා නැගිටිම් යම් මම් පියා සොයා
මේ සසරෙන් මම මිදී කෙදා එම් ද පියේ ඔබෙ වහල සොයා
මා එනතුරු ඔබ සුසුම් හෙළා ඇස් දිගු කැරැගෙනැ සිටිති බලා
කවදා ඔබ මගෙ බෙල්ල බදා හාදු දිදී පිළිගන්නේ මා
මුදුවක් ඇගිල්ලෙ මගේ දමා මඟුල් ඇඳුම මට පොරවාලා
සදාකාල මංගල මේසේ බොජුනට මා ළංකැරැ ගන්නේ
“නොදකින” දේ මා අදහන්නේ, අදහන දේ මා දැකැගන්නේ
ළැමේ එදා අබ්‍රහමුන්ගේ දුප්පත් ලාසරු ලැගුණ වගේ
ඔබගේ තුරුල්ලෙ මගේ පියේ සැතපෙන්නට මට කවද ලැබේ
ඔබයි මගේ හොඳ තාත්තනේ, මගේ මැ ගැළවුම් ගුරු සමිඳේ
සුදත් සුරිඳු මගෙ අසුවැසුමේ තියෙක දෙවිඳු මගෙ ආනන්දේ
